/R.G.
Bestatter. Familienvater.

Aso für mich isches emal ganz klar – das ich z’allererscht mal vor Ort gahne und emal luege, was isch überhaupt passiert. Denn isches für mich ganz ganz wichtig, das – das ich innere relativ churze Ziit es grosses Vertraue gschänkt überchume. Will – ich chume zu wildfremde Mänsche, die känned mich nöd und ich känn sie nöd – und glich bin ich jetzt i dere Gschicht und oft die intimschte Gschichte vo Mänsche… es Biispiil, ich muess öpper go hole wo ufem WC verstorbe isch. Ja wer laht me ufs WC ( ? ), das isch eigentlich euses einzige Ort, wo mer i de Regel – nöd emal Partner oder Partnerinne oder – det isch mer wie für sich. Und jetzt chum ich als wildfremdi Person und sött die Person abem WC näh. Das löst oft Scham us, für die Mänsche wo zrugg blibe sind. Sisch wichtig, dass sie wie es Vertraue chönd gäh, dass sie au wüssed, einersits isch das für de Bestatter öppis wo er weiss, wie er demit umgaht, es isch öppis wo er kännt und – es isch au d’Form vom me müend em jetzt s’Mami ahvertraue. Und wänns wie säged, die Lüt wo jetzt bi eus gsi sind : ‹‹da hani s’Gfühl, da isch s’Mami würklich i guete Händ››, dänn hät mers wie gschafft, ihne s’Liebschte müesse ewäg znäh, aber – dass sies wie ime grosse Vertroue mir chönd mitgäh. Und das isch öppis, je schnäller das ich das überchumme umso eifacher gahts nacher für die Ahghörige ihri Situation und ihres Verstorbnige schlussendlich mir ahzvertroue und im Endeffekt mitzgäh. Will wenns mir vertroued, vertroueds mer au ihres Liebschte a. Und wenn öpper chunnt wo so, ich säg jetzt mal eifach so rüpelhaft und pflockig so : ‹‹Ja nei, jetzt muessi zu eu au no cho und mached vorwärts ich wott fiirabig und…›› – äh dänn gspüred Ahghörigi das. Will Mänsche wo i de Truur sind, sind sehr sehr sensibel. Und da glaub ich ischs eifach au wichtig das mers eifach schafft, au vomene wildfremde Mänsch wo mer nöd kännt, möglichscht bald, es möglichscht grosses Vertroue dörfe überzcho. Das isch für mich immer scho so gsi, es grosses Gschänk. Mänsche wo mir vertroued, schänked mir es grosses Gschänk.

Antworten der anderen Personen