Dä han ich scho gstaltet *lächelt* – aso meined Sie mini Abdankig ( ? ) [ … ] Ja aso wänns ums Sterbä gaht, da weiss ich ja nöd was uf mich zuechunnt und da han ich ja kei Ahnig, oder – ich mein, jedä hät irgendwo durre chli en Film im Chopf, wänn er ehrlich isch, und jedä weiss, dases irgendwänn sowit isch. Aber au ich bin öppert wo zwüschetdurre de Tod erfolgrich uf d’Siite stellt, denn dä Tod passiert jo immer de Anderne, dä passiert ja nöd eim sälber, oder ( ? ) und ( ähm ) und wänns aber eso wär, dänn würd ich mir ebe genau das wünsche das was mir vorher besprochä händ, das ich Zit han, das ich mich chan verabschide, das ich mich mit mine Liebschte… dasi villicht auno nomal chan Danke säge, das find ich zum Biispiil öppis ganz Wichtigs. – Han ich mich namal bi allne bedankt wo mir im Läbe guets tah händ ( ? ) – nöd irgendwie ime Nachruef oder so, sondern ganz persönlich und au, dä Abschied z’gstalte und z’säge : ‹‹ich gseh dich jetzt villicht zum letschtä Mal und ich möcht, ich möcht das mir jetzt so usenand göhnd das ich jetzt im Fride chan gah›› – wänn ich das überhaupt no bewusst erläbe. Und s’Andere isch halt – will ich nöd weiss wies chunnt – das… villicht erstuunt Sie jetzt das, ich bin überzügts Exit-Mitglied, oder. Ich will… ja i üserer Szenä isch mer mängisch echli ent­-rüschtet. Wänn Palliativler säged : ‹‹Ich bin überzügts Exit-Mitglied››, dänn schüttled die de Chopf und dänked ‹‹du häsch öppis nöd kapiert››, oder. Und ( äh ) und das isch zum Teil e rächt e fundamentali Szenä, oder. Und ich ( ähm ) ich würd eigentlich… ich möcht… han vorher gseit würdevoll… ich möcht würdevoll gah. Und würdevoll gah heisst für mich ich möcht d’Wahl ha. Ich möcht d’Wahl ha, jenachdem was chunnt. Ich weiss nöd villicht bechumi ALS, wird ich demänt, han ich irgendwie müesame Chräbs wo mir s’Läbe dermasse schwer macht das ich eifach find, das möcht ich jetzt nöd dur alli Böde dure bis zum Schluss mit­-mache, oder. Oder ich chotz numme no, es bisst mich überall, ich ha Durchfall, s’sprützt überall us mir use und so, das wär under Umständ eso dasi säg : ‹‹Okay, danke. S’langt››. Ja ( ? ) ( Ähm ) Und nacher… und das han ich jetzt mit mine Nöchschtä besproche, es git en Ort wo mir sehr vill bedüted – wo ich — gern möchti, dass das wo vo mir übrig blibt – ich wird kremiert werdä – das muess au so sii *lächelt* und dass das wo vo mir übrig blibt a däm Ort am Wasser übergäh wird. – villicht mitere ‹Peace Box›, die findi total läss. Ja.